Mahalla raisi pora olayotganida qo‘lga tushdi
Mahalla fuqarolar yig‘inining raisi qachonki shu mahallada yashovchi barcha fuqarolarning dardu-tashvishiga hamdard bo‘lib, ularning hurmati va ishonchini qozona olsagina, uni mukammal darajadagi rais – oqsoqol deyishga arziydi.
Gurlan tumanidagi mahalla fuqarolar yig‘inidan biriga raislik qilib kelayotgan, 1962 yilda tug‘ilgan, N.A. ikki yoshga to‘lmagan farzandi uchun nafaqa tayinlanishida yordam so‘rab murojaat qilgan fuqaroga otalarcha g‘amho‘rlik qilish o‘rniga, aksincha 400 000 so‘m miqdorda pora talab qilgan.
Mazkur fuqaroning ichki ishlar organlariga qilgan murojaati asosida o‘tkazilgan tezkor tadbir davomida, talab qilingan pulning bir qismini, yaʼni 350 000 so‘m pulni pora tariqasida olayotgan mahalla fuqarolar yig‘ini raisining qilmishi fosh etildi.
Mazkur holat yuzasidan O‘zbekiston Respublikasi Jinoyat kodeksining 210-moddasi 1-qismi (pora olish) bilan jinoyat ishi qo‘zg‘atilib, tergov harakatlari olib borilmoqda.
Xorazm viloyati IIB Axborot xizmati
