Мамлакатимиз келажаги бўлган ёшларни маънавиятимизга ёт ғоялар таъсиридан сақлаш ҳамда уларда жиноят ва ҳуқуқбузарликка қарши муросасизлик ҳиссини шакллантириш орқалигина келгусида жамият учун фойдали кадрлар етишиб чиқишини таъминлаш мумкин.

“Ёшларни қўллаб-қувватлаш ва аҳоли саломатлигини мустаҳкамлаш йили” деб номланган жорий йилда ёшлар билан ишлаш масаласи ҳам янгича тизим ва босқичда амалга оширилмоқда. 

Хоразм вилояти Ички ишлар бошқармасининг масъул ходимлари айни кунларда вилоятдаги олий таълим муассасаларида таҳсил олаётган ёшлар  ўртасида ҳуқуқбузарликлар профилактикасига оид учрашувлар ва давра суҳбатларини ўтказиб келмоқдалар.

Ана шундай учрашувлардан навбатдагиси Тошкент тиббиёт академиясининг Урганч филиали талабалари билан бўлиб ўтди.

“Мен жиноят ва ҳуқуқбузарликка қаршиман” ва  номли мавзу асосида ташкил этилган давра суҳбатида вилоят ИИБ Ҳуқуқбузарликлар профилактикаси бошқармаси бошлиғининг хотин-қизлар масалалари бўйича ўринбосари майор Д.Боғибекова ва Урганч шаҳар Бош имомининг хотин-қизлар масалалари бўйича ёрдамчиси Ф.Отажановалар томонидан талабаларга диний мутаассиблик, унинг кўринишлари ҳамда жиноят ва ҳуқуқбузарликлар профилактикасига оид тушунчалар берилди.

Шунингдек, талабаларга интернет ва ундаги ижтимоий тармоқлар имкониятларидан тўғри  фойдаланиш юзасидан ҳам зарур тавсиялар берилди.

Учрашув якунида, таълим даргоҳи талабалари ўртасида ҳуқуқий маданият ва маънавий-маърифий ишларни ривожлантиришдаги муносиб ҳиссаси учун Д.Боғибекова ва Ф.Отажановаларга Тошкент тиббиёт академияси раҳбариятининг “Ташаккурнома”си топширилди.  

Хоразм вилояти ИИБ Ахборот хизмати