Ichki ishlar vazirligining Xorazm akademik litseyida Prezidentimiz tomonidan ilgari surilgan “Besh tashabbus” doirasida o‘quvchilarning jismoniy tayyorgarligi va bilim ko‘nikmalarini sinovdan o‘tkazish maqsadida “Jaloliddin izdoshlari” harbiy-sport musobaqalari, “Kompyuter dasturchisi bilimdoni”, “Eng yaxshi kitobxon” tanlovlari hamda “Bilimdon” intellektual o‘yinlari  doimiy ravishda o‘tkazib borilmoqda.

9 noyabr kuni akademik litseyda o‘quvchilarning bilim ko‘nikmasini sinovdan o‘tkazish  maqsadida “Zakovat” breyn-ring intellektual o‘yinlari o‘tkazildi. Bunda Xorazm viloyati “Zakovat” klubi koordinatori Azamat Matkarimov hamda “Zakovat” klubi aʼzosi Jaloliddin Tojiyevlar hakamlik qilishdi. Klub aʼzolarining bilimdonlik mahorati o‘quvchilarda katta qiziqish uyg‘otdi. Musobaqaning final bosqichiga chiqish “Xorazmshohlar” hamda “Lider” jamoalariga nasib etdi. Yakuniy bellashuvda “Zakovat” breyn-ring o‘yinlarining litsey birinchiligida  “Lider” jamoasi mutloq g‘oliblikni qo‘lga kiritdi.

 -Litseyimizda iqtidorli o‘quvchilar ko‘pchilikni tashkil etadi,-deydi akademik litseyning Yoshlar ittifoqi yetakchisi Rustam Boltayev.-Ushbu intellektual ringda bunga yana bir bor amin bo‘ldik. Eng bilimdon, zukko va zehnli o‘quvchilar jamoasi peshqadam bo‘ldi.

 G‘olib jamoa O‘zbekiston Respublikasi Konstitutsiyasi qabul qilinganligining 29 yilligi munosabati bilan Ichki ishlar vazirligi taʼlim muassasalari o‘rtasida bo‘lib o‘tadigan  “Zakovat” breyn-ring o‘yinlarining respublika bosqichida ishtirok etish huquqini qo‘lga kiritdi.

                                                                         Elyorbek MATYOQUBOV,

                                                            IIV Xorazm akademik litseyi o‘quv

                                                            bo‘limi mudiri