O‘zbekiston Respublikasi Prezidentining "Ichki ishlar organlarining voyaga yetmaganlar o‘rtasida huquqbuzarliklar profilaktikasiga oid faoliyatini takomillashtirish bo‘yicha qo‘shimcha chora-tadbirlar to‘g‘risida"gi 2025-yil 18-martdagi PQ-110-sonli Qarori ijrosini taʼminlash maqsadida Ichki ishlar vaziri o‘rinbosarining 2025-yil 31-mart kunidagi Farmoyishiga asosan umumiy o‘rta taʼlim maktablariga tashkiliy va tarbiya-metodik jihatdan manzilli ko‘maklashish maqsadida ishchi guruhi tarkibi tasdiqlandi.

Mazkur ishchi guruh vakillari tomonidan hududlarda belgilangan chora-tadbirlarni sifatli tashkil etish hamda bu borada viloyat Ichki ishlar boshqarmasi masʼul xodimlariga amaliy yordam ko‘rsatish jarayonlari uyushqoqlik bilan olib borilmoqda.

Xususan, Xorazm viloyatiga biriktirilgan vazirlik ishchi guruhi hamda viloyat Ichki ishlar boshqarmasi, shuningdek Urganch shahar hokimligi mutasaddilari tomonidan Urganch shahridagi  8-sonli  umumtaʼlim maktabida o‘rganish ishlari olib borildi.

Dastlab, taʼlim maskanidagi barcha maʼmuriy binolar, o‘quv xonalari va mavjud shart-sharoitlar atroflicha o‘rganildi. Taʼmirtalab binolarni joriy taʼmirlash, maktab hududini obodonlashtirish, maktabning moddiy-texnik bazasini boyitish bo‘yicha chora-tadbirlar dasturi ishlab chiqildi.

Bundan tashqari dars jarayonlari o‘rganilib, maktab masʼullari hamda o‘quvchilar bilan o‘zaro ishonch asosida o‘tkazilgan suhbat davomida ularning qiziqishlari va kelgusi rejalari tinglandi.

Aniqlangan kamchiliklar va muammolarni bartaraf etish yuzasidan masʼullarga zaruriy ko‘rsatma hamda topshiriqlar berildi.

Xorazm viloyati IIB Axborot xizmati