O‘zbekiston Respublikasi Prezidentining 2021 yil 2 apreldagi Qarori bilan tasdiqlangan “Ichki ishlar organlarida maʼnaviy-maʼrifiy ishlarni tashkil etish konsepsiyasi” asosida ichki ishlar organlari tizimida xizmat qilayotgan barcha xodimlarning umumiy dunyoqarashi, siyosiy ongi, maʼnaviy va intellektual salohiyatini yuksaltirish, ularda vatanparvarlik, g‘urur, iftixor, kasbiga nisbatan sadoqat va yuqori masʼuliyat hislarini oshirish maqsadida hududlarda maʼnaviy-maʼrifiy yo‘nalishda olib borilayotgan tadbirlar ko‘lami kengayib bormoqda.

IIV Urganch xalqaro aeroportida xavfsizlikni taʼminlash batalyoni rahbariyati tomonidan Xorazm musiqali drama teatrida uyushtirilgan navbatdagi maʼnaviy-maʼrifiy tadbirning eʼtiborga molik jihati shundaki, tadbirga harbiy qism shaxsiy tarkibi bilan birgalikda ularning oila aʼzolari, farzandlari ham taklif etildi.

Xorazm musiqali drama teatrining ijodiy jamoasi tomonidan sahnalashtirilgan va namoyish etilgan “Oppog‘oy va uning do‘stlari” nomli spektakl nafaqat bolajonlar uchun yangi yil sovg‘asi bo‘ldi, shu bilan birgalikda ularning ota-onalariga ham o‘z bolaliklarini eslatdi desak mubolag‘a bo‘lmaydi.

Teatr tomoshalaridan keyingi oilaviy tanishuv va dildan qurilgan samimiy suhbatlar esa ishtirokchilarda unutilmas taassurotlar qoldirdi.

Xorazm viloyati IIB Axborot xizmati