Xorazm viloyati IIB Tibbiyot bo‘limida ichki ishlar vazirligi tizimidagi davolash-profilaktika muassasalari tibbiyot xodimlari o‘rtasida eʼlon qilingan “Yilning eng yaxshi tibbiy hamshirasi” ko‘rik-tanlovining hududiy bosqichi bo‘lib o‘tdi.

Tibbiyot xodimlarining kasbiy bilim va malakalarini oshirib borishni qo‘llab-quvvatlash hamda faoliyatida yutuqlarga erishayotgan tibbiyot xodimlarini moddiy va maʼnaviy rag‘batlantirish, o‘z kasbining mohir egalari o‘rtasida sog‘lom raqobat muhitini shakllantirish maqsadida joriy etilgan ushbu ko‘rik-tanlovning hududiy bosqichida Xorazm viloyati IIB Tibbiyot bo‘limining kamida 3 yillik amaliy ish stajiga ega bo‘lgan, o‘rta tibbiy maʼlumotli, o‘zining yuqori bilimi, kasbiy malakasi, shaxsiy xislatlari bilan hamkasblaridan ajralib turgan, mehnat faoliyati davomida boshqalarga o‘rnak bo‘lib kelayotgan hamshiralari faol ishtirok etdilar.

Ko‘rik-tanlovda ishtirokchilar dastlab milliy urf-odatlarimiz va o‘zbekona axloq qoidalariga mos holda tanishtiruv shartini bajardilar.

Ikkinchi shartda ishtirokchilarning sohaviy va maʼnaviy-maʼrifiy bilimlari savol-javob tarzida baholandi.

Ishtirokchilarning amaliy bilim darajasini aniqlashga qaratilgan uchinchi shartda tibbiy hamshiralar o‘z faoliyatlarida qo‘llaniladigan amaliy ko‘nikmalarni sinovdan o‘tkazdilar.

Ko‘rik-tanlovning to‘rtinchi sharti hisoblangan erkin mavzu shartida ishtirokchilar tomonidan o‘zlari yoqtirgan mavzu, yo‘nalish bo‘yicha ijro etilgan kuy, qo‘shiq, monolog va raqslar barchaga ko‘ratinki kayfiyat ulashib, ko‘rik-tanlovning yuqori saviyada o‘tishini taʼminladi.

Murosasiz, shu bilan birgalikda do‘stona ruhda o‘tgan bellashuvlar hakamlar xayʼati tomonidan baholab borildi va yakunda faxrli uchinchi o‘rinni hamshira Dilfuza Qarayeva, ikkinchi o‘rinni Saida Yusupova egallagan bo‘lsa, tibbiyot bo‘limi gospitali navbatchi hamshirasi Hayitjon Madaminova ko‘rik-tanlovning hududiy bosqichi g‘olibasi deb topildi va respublika bosqichida ishtirok etish uchun yo‘llanmani qo‘lga kiritdi.

Xorazm viloyati IIB Axborot xizmati