Ayni kunlarda O‘zbekiston Respublikasi ichki ishlar organlari tarkibidagi ekspert-kriminalistika xizmatining faoliyatini yana-da takomillashtirishga alohida eʼtibor qaratilib, bu borada bir qator normativ-huquqiy hujjatlar qabul qilinganligini alohida taʼkidlab o‘tish maqsadga muvofiqdir.

O‘z faoliyatini tobora takomillashtirib borayotgan Xorazm viloyati IIB Ekspert-kriminalistika markazi xodimlari huquqiy targ‘ibot ishlariga ham masʼuliyat bilan yondashib kelmoqdalar.

Ushbu tamoyildan kelib chiqqan holda ichki ishlar organlari uchun malakali kadrlar tayyorlash hamda yoshlarda kasbga bo‘lgan sadoqatni va qiziqishni oshirish maqsadida, Xorazm viloyati IIB Ekspert-kriminalistika markazi xodimlari podpolkovnik S.Nurjanov va mayor B.Mirzayevlar tomonidan IIV Xorazm akademik litseyida “Hodisa sodir bo‘lgan joyga chiqish. Fotosuratga olish va uning usullari. Hodisa joyida texnik kriminalistik vositalardan to‘liq foydalanish. Daliliy ashyolarni aniqlash va olish usullari.” mavzusida mashg‘ulot o‘tkazildi.

Ilmiy-amaliy shaklda o‘tkazilgan mashg‘ulot davomida jinoyat va hodisa joylaridan olingan va jinoyatlarni fosh etishda muhim ahamiyatga ega bo‘lgan ashyoviy dalillarni olish hamda ularning jinoyatlarni fosh etishdagi o‘rni haqida atroflicha tushuntirishlar berildi.

Shuningdek mashg‘ulot doirasida o‘quvchilarning savollariga mutaxassislar tomonidan  batafsil maʼlumotlar berildi.

Xorazm viloyati IIB Axborot xizmati