Respublikamizning 3-sektorlarida yashovchi oilalar o‘rtasida sport musobaqalari va kitobxonlik bellashuvlarini o‘tkazish maqsadida, O‘zbekiston Respublikasi Ichki ishlar vazirligi, Mahalla va oilani qo‘llab-quvvatlash vazirligi, Madaniyat vazirligi hamda Turizm va sport vazirliklarining qo‘shma qarori ijrosini taʼminlash maqsadida Xorazm viloyatining 3-sektorlarida O‘zbekiston Respublikasi Ichki ishlar vaziri sovrini uchun “Sog‘lom va barkamol oila” shiori ostida o‘tkazilgan sport musobaqalari va kitobxonlik bellashuvlarining shahar-tuman bosqichi g‘oliblari aniqlanganligi to‘g‘risida xabar bergan edik.

20 dekabr kuni Urganch shahridagi “Yoshlik” sport majmuasida yuqoridagi musobaqaning Xorazm viloyati bosqichiga start berildi. “Stol tennisi”, “Quvnoq startlar”, “Shashka”, “Shaxmat” va “Badminton” turlari bo‘yicha o‘zaro kuch sinashgan oilalar o‘rtasidagi musobaqada yangibozorlik Jumanovlar oilasi 3-o‘rinni egallagan bo‘lsa, yangiariqlik Iskandarovlar oilasi 2-o‘ringa munosib ko‘rildi, sportsevarlik borasida Qo‘shko‘pir tumanidan tashrif buyurgan Sodiqovlar oilasiga teng keladigani topilmadi, o‘zlarining epchillik va chaqqonliklarini namoyish etgan ushbu oila sport musobaqasining mutloq g‘olibi deb topildi.

“Eng yaxshi maʼnaviy yetuk oila” nominatsiyasida g‘oliblikni aniqlash uchun kitobxon oilalar o‘rtasida o‘tkazilgan bellashuv ham unutilmas va hayojonli jarayonlarga boy bo‘ldi.

Xorazm viloyati Axborot resurs markazida tashkil etilgan bellashuv ishtirokchilari, oilalarida kitobxonlikka eʼtibor qaratilganligini, ayniqsa farzand tarbiyasida kitobning alohida o‘rin tutganligini ko‘rsata oldilar.

Kitobxonlik bellashuvi yakunida gurlanlik Yusupovlar oilasi 3-o‘rinni egallagan bo‘lsa, Tuproqqalʼa tumanidan tashrif buyurgan Yarashovlar oilasi 2-o‘rindan joy oldilar, yangiariqlik Karimovlar oilasi eng yaxshi maʼnaviy yetuk oila deb topilib, bellashuv g‘olibi aylandi.

“Sog‘lom va barkamol avlod” shiori ostida bo‘lib o‘tgan ushbu musobaqa g‘oliblariga diplom va qimmatbaho sovg‘alar Xorazm viloyati IIB rahbariyati tomonidan tantanali tarzda topshirildi. Xorazm viloyati bosqichida 1-o‘rinni egallagan qo‘shko‘pirlik Sodiqovlar va yangiariqlik Karimovlar oilasiga Ichki ishlar vaziri sovrini uchun bo‘lib o‘tayotgan mazkur sport musobaqalari va kitobxonlik bellashuvlarining mintaqaviy bosqichida ishtirok etish uchun yo‘llanma berildi.

Qizg‘in va murosasiz baxslarga boy bo‘lgan musobaqa ishtirokchilar va tashkilotchilarda unitilmas taassurot qoldirdi.

Xorazm viloyati IIB Axborot xizmati