Республикамизнинг 3-секторларида яшовчи оилалар ўртасида спорт мусобақалари ва китобхонлик беллашувларини ўтказиш мақсадида, Ўзбекистон Республикаси Ички ишлар вазирлиги, Маҳалла ва оилани қўллаб-қувватлаш вазирлиги, Маданият вазирлиги ҳамда Туризм ва спорт вазирликларининг қўшма қарори ижросини таъминлаш мақсадида Хоразм вилоятининг 3-секторларида Ўзбекистон Республикаси Ички ишлар вазири соврини учун “Соғлом ва баркамол оила” шиори остида ўтказилган спорт мусобақалари ва китобхонлик беллашувларининг шаҳар-туман босқичи ғолиблари аниқланганлиги тўғрисида хабар берган эдик.

20 декабрь куни Урганч шаҳридаги “Ёшлик” спорт мажмуасида юқоридаги мусобақанинг Хоразм вилояти босқичига старт берилди. “Стол тенниси”, “Қувноқ стартлар”, “Шашка”, “Шахмат” ва “Бадминтон” турлари бўйича ўзаро куч синашган оилалар ўртасидаги мусобақада янгибозорлик Жумановлар оиласи 3-ўринни эгаллаган бўлса, янгиариқлик Искандаровлар оиласи 2-ўринга муносиб кўрилди, спортсеварлик борасида Қўшкўпир туманидан ташриф буюрган Содиқовлар оиласига тенг келадигани топилмади, ўзларининг эпчиллик ва чаққонликларини намойиш этган ушбу оила спорт мусобақасининг мутлоқ ғолиби деб топилди.

“Энг яхши маънавий етук оила” номинациясида ғолибликни аниқлаш учун китобхон оилалар ўртасида ўтказилган беллашув ҳам унутилмас ва ҳаёжонли жараёнларга бой бўлди.

Хоразм вилояти Ахборот ресурс марказида ташкил этилган беллашув иштирокчилари, оилаларида китобхонликка эътибор қаратилганлигини, айниқса фарзанд тарбиясида китобнинг алоҳида ўрин тутганлигини кўрсата олдилар.

Китобхонлик беллашуви якунида гурланлик Юсуповлар оиласи 3-ўринни эгаллаган бўлса, Тупроққалъа туманидан ташриф буюрган Ярашовлар оиласи 2-ўриндан жой олдилар, янгиариқлик Каримовлар оиласи энг яхши маънавий етук оила деб топилиб, беллашув ғолиби айланди.

“Соғлом ва баркамол авлод” шиори остида бўлиб ўтган ушбу мусобақа ғолибларига диплом ва қимматбаҳо совғалар Хоразм вилояти ИИБ раҳбарияти томонидан тантанали тарзда топширилди. Хоразм вилояти босқичида 1-ўринни эгаллаган қўшкўпирлик Содиқовлар ва янгиариқлик Каримовлар оиласига Ички ишлар вазири соврини учун бўлиб ўтаётган мазкур спорт мусобақалари ва китобхонлик беллашувларининг минтақавий босқичида иштирок этиш учун йўлланма берилди.

Қизғин ва муросасиз бахсларга бой бўлган мусобақа иштирокчилар ва ташкилотчиларда унитилмас таассурот қолдирди.

Хоразм вилояти ИИБ Ахборот хизмати