O‘zbekistan Respublikasi Prezidentining “Sog‘lom turmush tarzini keng tatbiq etish va ommaviy sportni yana-da rivojlantirish chora-tadbirlari to‘g‘risida” Farmoni va Vazirlar Mahkamasining “Aholining sog‘lom turmush tarzini qo‘llab-quvvatlash va jismoniy faolligini oshirishga doir qo‘shimcha chora-tadbirlar to‘g‘risida” Qarori ijrosini taʼminlash hamda ichki ishlar organlarida jismoniy tarbiya va sportni ommalashtirish, sog‘lom turmush tarzini keng targ‘ib qilish. shuningdek, jismoniy faollik tadbirlarini tizimli va samarali tashkil etish maqsadida O‘zbekiston Respublikasi Ichki ishlar Vazirining Vazirlik tarkibiy va hududiy bo‘linmalari xodimlari o‘rtasida futbol sport turi bo‘yicha “Vazir kubogi” musobaqasini o‘tkazish to‘g‘risidagi buyrug‘iga asosan joriy yilning 4 aprel kuni Urganch shahrida musobaqaning mintaqaviy saralash guruh bosqichiga start berildi.

Urganch shahridagi “Yoshlik” sport majmuasining futbol maydonida musobaqaning ochilishiga bag‘ishlab o‘tkazilgan tadbirda musobaqaning “A” guruhidan o‘rin olgan Qoraqalpog‘iston Respublikasi IIV, Navoiy viloyati IIB, Transport va turizm obyektlarida  xavfsizlikni taʼminlash departamenti, Qorovul Qo‘shinlari Qo‘mondonligi hamda Xorazm viloyati IIB terma jamoalari ishtirok etdi.

Tadbirda Xorazm viloyati IIB boshlig‘ining o‘rinbosari polkovnik Abduvoxid Imyaminov va IIV Maʼnaviy-maʼrifiy ishlar va kadrlar bilan taʼminlash xizmati masʼul xodimi podpolkovnik Ozodbek Nasimovlar so‘zga chiqib, musobaqani o‘tkazishdan ko‘zlangan maqsad ichki ishlar organlarida sog‘lom turmush tarzini keng targ‘ib kilish, shaxsiy tarkib o‘rtasida sportning futbol turini ommalashtirish, eng asosiysi xodimlarning jismoniy faolligini oshirishdan iborat ekanligini taʼkidlab o‘tdilar.

O‘zbekiston Respublikasi Davlat Madhiyasi ijro etilgach musobaqani boshlash to‘g‘risida hakamning xushtagi chalindi.

Dastlab, mezbon jamoa hisoblangan Xorazm viloyati IIB va Navoiy viloyati IIB terma jamoalari vakillari maydonga tushdilar.

Musobaqalar 4-5 aprel kunlari Urganch shahridagi “Yoshlik” sport majmuasining futbol maydonida bo‘lib o‘tadi. Futbol ishqibozi bo‘lgan yurtdoshlarimizni jamoalar o‘rtasidagi qiziqarli va murosasiz bellashuvlarni tomosha qilishga taklif qilamiz.

Xorazm viloyati IIB Axborot xizmati