Xorazm viloyati bo‘ylab targ‘ibot avtokarvoni kezmoqda
Yo‘l-transport hodisalari bugungi kunning dolzarb muammolaridan biri desak mubolag‘a bo‘lmaydi. Chunki har yili yo‘l-transport hodisalari bir necha insonlarning o‘limiga, ko‘plab insonlarning nogiron bo‘lib qolishiga sabab bo‘lmoqda. Yo‘l-transport hodisalari natijasida ko‘riladigan moddiy zarar esa har qanday oila uchun ortiqcha tashvish hisoblanadi.
Xorazm viloyatida yo‘l-transport hodisalarining oldini olishga qaratilgan profilaktik chora-tadbirlarni yana-da kuchaytirishga qaratilgan maqsadli va manzilli ishlar amalga oshirilmoqda.
Ana shunday tadbirlar doirasida Xorazm viloyati bo‘ylab targ‘ibot avtokarvoni yo‘lga chiqdi.
Yo‘l-transport hodisasi tufayli ayanchli ahvolga kelib qolgan transport vositalari ortilgan evakuatorlardan iborat targ‘ibot avtokarvoni viloyatning barcha shahar va tumanlari bo‘ylab olib o‘tiladi.
Xorazm viloyati IIB Axborot xizmati
