Хоразм вилояти ИИБ Жамоат тартибини сақлаш бошқармасига қарашли Кинология бўлинмаси 2000 йилларда ички имкониятлардан келиб чиққан ҳолда ҳашар йўли билан қурилган бинода фаолият юритиб келаётган эди. Деярли 25 йил давомида кинолог-ходимлар ва хизмат итлари учун замонавий бино қуриш имконияти юзага келмаган эди. Тан олиш керакки Янги Ўзбекистонда ички ишлар органлари ҳам янгича тус олмоқда, тизимнинг моддий-техник базасини бойитиш, замонавий бино-иншоотлар ва энг сўнгги русумдаги техникаларни ажратилиши кескин ортиб бормоқда.

Бундан қарийб бир йил олдин Кинология бўлинмаси фаолияти билан танишган Хоразм вилояти ИИБ бошлиғи бўлинма маъмурий ва ёрдамчи хўжалик биноларини замонавий типда мукаммал таъмирлаш бўйича масъулларга аниқ топшириқлар берган эди.

Шундан келиб чиққан ҳолда 5 ой муддатда Кинология бўлинмасида мукаммал таъмирлаш ишлари олиб борилди.

Янги йил байрами арафасида таъмирлаш ишлари якунланган ушбу бино фойдаланишга топширилди.

Шу муносабат билан бўлиб ўтган тадбирда вилоят ИИБ бошлиғи, Кинология бўлинмаси шахсий таркиби ва соҳа фахрийлари иштирок этдилар.

Миллий урф одатларимизга кўра эзгу ниятлар дуоси ила рамзий лента кесилгач, тадбир иштирокчилари маъмурий бинода яратилган шарт-шароитлар билан яқиндан танишдилар.

Шунингдек тадбир иштирокчиларига Кинология бўлинмаси томонидан эришилган натижалар, шунингдек истиқболи ва стратегик режалар юзасидан тақдимот ўтказилди.

Хизматли итлари ёрдамида намойиш этилган кўргазмали чиқишлар барчада катта таассурот қолди.

Шуни алоҳида таъкидлаш лозимки, Кинология бўлинмасида нафақат шахсий таркиб шу билан биргаликда хизмат итларини сақлаш, уларни парваришлаш, махсус курслар бўйича ўқитиш ва даволаш учун зарур бўлган барча шароитлар тўлиқ яратилди. 

Аҳолига тегишли бўлган итларни пуллик хизмат асосида парваришлаш ва махсус курслар бўйича ўқитиш учун алоҳида бино барпо этилди.

Тадбир якунида қурилиш таъмирлаш ишларини ўз вақтида ва сифатли бажарилишини таъминлаганлиги учун қурилиш фирмаси раҳбарига миннатдорчилик билдирилиб, тўн кийдирилди.

Ушбу бино Кинология бўлинмаси ходимлари учун Янги йил байрамига муносиб совға бўлди десак муболаға бўлмайди.

Хоразм вилояти ИИБ Ахборот хизмати