15 январь куни Хонқа тумани Ички ишлар бўлимида Хоразм вилояти ИИБ бошлиғи раислигида тезкор йиғилиш ўтказилди.

Йиғилишда Хонқа тумани ИИБ бошлиғининг ўринбосарлари, соҳавий хизматлар раҳбар ва масъул ходимлари иштирок этдилар.

Йиғилишда ташкилий масала кўриб чиқилди. Хонқа тумани ИИБ бошлиғи лавозимида ишлаб келган подполковник Ихтиёр Аллаберганов бошқа ишга ўтиши муносабати билан унинг вазифаларини вақтинчалик бажариш туман ИИБ бошлиғининг биринчи ўринбосари лавозимида ишлаб келаётган подполковник Санжар Матяқубов зиммасига юклатилганлиги йиғилиш иштирокчилари эътиборига етказилди.

Танқидий руҳда бўлиб ўтган йиғилишда вилоят ИИБ бошлиғи Хонқа тумани Ички ишлар бўлими томонидан туман ҳудудида жиноят ва ҳуқуқбузарликларнинг олдини олиш, содир бўлган жиноятларни фош этиш, шахсий таркиб ўртасида хизмат ва ижро интизоми ҳамда қонунчиликни мустаҳкамлаш борасида амалга оширилган ишлар ва йўл қўйилган камчиликларни муҳокама этди.

Мазкур йўналишлар бўйича камчиликларга йўл қўйган масъул раҳбарларнинг ҳисоботлари эшитилди.

Вилоят ИИБ бошлиғи томонидан йиғилишда жорий, 2025 йилда туман ҳудудида криминоген вазиятни барқарорлаштириш бўйича ҳуқуқ-тартибот ва назорат органлари ҳамда ҳамкор ташкилотлар ўртасида ўзаро ҳамкорликни кучайтириш,  жамоат жойлари, аҳоли гавжум бўладиган масканлар, савдо ва маиший хизмат кўрсатиш объектлари ҳамда маҳаллаларга интеллектуал кузатув камераларини ўрнатиш ва ягона кузатув марказига интеграция қилиш бўйича олиб борилаётган ишларни қисқа муддатда якунига етказиш, девиант хулқли ўсмирлар ва ижтимоий ҳаётда ностандарт вазиятлар сабабли тушкунликка тушиб қолган аёлларни соғлом ҳаётга қайтаришда “Келажак сари” ва “Мен кучли аёлман” номи остида ўтказилаётган ижтимоий-профилактик лойиҳалар имкониятларидан самарали фойдаланиш бўйича топшириқ ва кўрсатмалар берилди.

Йиғилишда муҳокама этилган масалалар юзасидан тегишли қарорлар қабул қилинди.

Хоразм вилояти ИИБ Ахборот хизмати