Ҳар бир маъмурий ҳудуд ижтимоий-иқтисодий ривожлантириш бўйича тўртта секторга ажратилган бўлиб, 3-секторга ҳудудий ички ишлар органи бошлиғи раҳбарлик қилиши белгиланган.

Ўз навбатида сектор раҳбарларнинг бу борадаги ишларни тўғри ташкил этиши ва самарадорликка эришиши тасдиқланган меъзонлар бўйича баҳолаб борилади.

Жумладан, айни кунларда сектор раҳбарлари ўртасида хотин-қизлар муаммоларини тизимли равишда ҳал этиш, уларни ижтимоий қўллаб-қувватлаш ҳамда “Аёллар дафтари” ижроси бўйича ташкил этилган республика кўрик танловининг Хоразм вилояти босқичи ғолиблари аниқланди.

Баҳолаш меъзонига кўра Хива шаҳрини ижтимоий-иқтисодий ривожлантириш бўйича 3-сектор раҳбари, Хива шаҳар ИИБ бошлиғи подполковник Ботир Отажанов танловнинг вилоят босқичида фахрли 3-ўринни эгаллади.

28 август куни Хоразм вилояти Ҳокимлигида танлов ғолибларини тақдирлаш жараёни бўлиб ўтди ҳамда ғолибларга диплом ва совғалар топширилди.

Шунингдек,  хотин-қизларни ижтимоий-иқтисодий, ҳуқуқий ва психологик қўллаб-қувватлаш, бандлигини таъминлаш, тадбиркорлигини йўлга қўйиш борасидаги ишларни самарали ташкил этиш ҳамда “Аёллар дафтари”га киритилган хотин-қизларнинг муаммоларини тизимли равишда ҳал этишда ўзининг меҳнати билан барчага намуна кўрсатиб келаётганлиги учун  Хоразм вилояти ИИБ секторлар фаолиятини мувофиқлаштириш бўлими бошлиғи подполковник Шухрат Искандаров Касаба уюшмалари федерацияси Хоразм вилоят кенгашининг фахрий ёрлиғи ва эсдалик совғаси билан тақдирланди.

Хоразм вилояти ИИБ Ахборот хизмати