28 Август 2020 йил 668

СЭОМ раҳбари жиноят устида қўлга олинди

Коронавирус инфекциясининг тарқалиши пандемия даражасига чиққан шу кунларда санитария эпидемиологик осойишталик маркази ходимларидан ўз хизмат вазифаларига янада масъулият билан ёндашиш талаб этилади.

Урганч шаҳар СЭОМ раҳбари, З.Қ. эса ўзига билдирилган ишончни суиистеъмол қилиб, хизмат ваколатидан фойдаланган ҳолда ноқонуний равишда шахсий бойлик орттириш режасини тузди.

Қассобчилик фаолияти билан шуғулланмоқчи бўлган бўлган, Урганч туманида яшовчи фуқаронинг ишончига кириб, келгусида тадбиркорлик фаолиятининг солиқ органлари томонидан текширилмаслигини таъминлаб беришни ваъда қилиб, фирибгарлик йўли билан 300 000 сўм пул талаб қилган, З.Қ. жорий йилнинг 25 август куни Хоразм вилояти ИИБ Жиноят қидирув бошқармаси ходимлари томонидан ўтказилган тезкор тадбир натижасида талаб қилган суммадаги пулни олаётган пайтида жиноят устида қўлга олинди.

Мазкур ҳолат юзасидан Ўзбекистон Республикаси Жиноят кодексининг 168-моддаси 3-қисми билан жиноят иши қўзғатилиб тергов ҳаракатлари олиб борилмоқда.

Хоразм вилояти ИИБ Ахборот хизмати

Text to speech