Жорий йилнинг 12 сентябрь куни Тупроққалъа туманида Хоразм вилояти ИИБ Ҳуқуқбузарликлар профилактикаси бошқармаси, Тупроққалъа тумани ИИБ ва туман ҳокимлиги Оила ва хотин-қизлар масалалари бўлими ҳамкорлигида йиғилиш бўлиб ўтди.

Йиғилишда Ўзбекистон Республикаси Президентининг 2022 йил 7 март кунидаги “Оила ва хотин-қизларни тизимли қўллаб-қувватлашга доир ишларни янада жадаллаштириш чора-тадбирлари тўғрисида”ги Фармонининг Тупроққалъа туманидаги ижроси муҳокама қилинди.

Хусусан, туманда хотин-қизларнинг ҳуқуқ ва қонуний манфаатларини ҳимоя қилиш, уларнинг иқтисодий, ижтимоий ва сиёсий фаоллигини ошириш, соғлигини сақлаш, касбга ўқитиш ва бандлигини таъминлаш, тадбиркорликка кенг жалб этиш, эҳтиёжманд хотин-қизларни ижтимоий қўллаб-қувватлаш, гендер тенгликни таъминлаш борасидаги чора-тадбирларни амалга оширишда туман ҳокимлиги, ички ишлар бўлими ва маҳалла фуқаролар йиғишларининг ўзаро ҳамкорлиги атрофлича таҳлил этилиб, келгусида бу борадаги ҳамкорликни янада кучайтириш истиқболлари белгилаб олинди.

Маҳаллада яшовчи, оилавий низолар сабабли “ҳимоя ордери” берилган хотин-қизларнинг ҳимоя ҳуқуқи бузилишининг олдини олишда туман ички ишлар бўлимига яқиндан ёрдам бериб келаётган маҳалла фуқаролар йиғини аёллар фаолларига миннатдорчилик билдирилди.

Шундан кейин ишчи гуруҳ аъзолари Тупроққалъа туманида “Темир дафтар”, “Аёллар дафтари”, “Ёшлар дафтари”га киритилган хотин-қизларни иш билан таъминлаш аҳволини яқиндан ўрганиш мақсадида тумандаги 3-сектор раҳбари ташаббуси билан ташкил этилган тикувчилик цехида бўлиб, ишчилар учун яратилган шарт-шароитлар билан танишдилар.

Хоразм вилояти ИИБ Ахборот хизмати