Бугунги кунда мамлакатимизда аҳоли ўртасида китобхонлик кенг тарғиб этилмоқда. Чунки китоб - барча билим ва муваффақиятларнинг калитидир десак муболаға бўлмайди.

Шундан келиб чиққан ҳолда китобхонлик тарғиботи масаласига Хоразм вилояти ички ишлар органларида ҳам алоҳида эътибор қаратилган.

Бу борадаги ишлар вилоят ИИБ Маънавий-маърифий ишларни ташкил этиш ва кадрлар билан таъминлаш хизмати ходимлари томонидан тизимли равишда олиб борилмоқда.

У китоб ўқиб ўз билим ва тафаккурини юксалтирган хотин-қизлар, нафақат ички ишлар органлари хизмати учун фойда келтиришини, шу билан биргаликда жамият ва оила равнақи учун ҳам жуда муҳимлигини англаган ҳолда Хоразм вилояти ички ишлар органларида хизмат қилиб келаётган хотин-қизлар ўртасида “Ҳаётингиз давомида ўқиган энг яхши асар”, “Ёшлар ва китобхонлик маданияти”, “Китоб – қалб гавҳари, кўнгил офтоби» каби мавзуларда маънавий-маърифий тадбирлар, шунингдек, халқимизнинг севган шоир ва ёзувчиларнинг ҳаёти ва ижодига бағишланган кечалар, қизиқарли танловлар, кутубхоналар бўйлаб саёҳатлар, китоблар кўргазмалари ташкил этиб келмоқда.

Подполковник Д.Боғибекова, майор Ю.Ҳамдамова, капитан Н.Бекчанова, капитан Д.Искандаров, катта лейтенант З.Ахмедова каби ўнлаб ходимлар  китобхонлар  сафидан муносиб ўрин эгаллашган.

Вилоят ИИБ хизмат қилаётганлар билан ўтказиладиган турли учрашув суҳбатларнинг айнан бошқарма кутубхонасида ўтказилаётганлиги эса, суҳбатларнинг тарбиявий аҳамиятини янада ошириши шубҳасиз.

Хоразм вилояти ИИБ Ахборот хизмати