Ички ишлар органларида хизмат қилаётган эркаклар билан бир қаторда хотин-қизлардан ҳам жисмоний тайёргарликка эга бўлишлари талаб этилади.

Бунда эса режа асосида ўтказиладиган жисмоний тайёргарлик машғулотлари билан бирга спорт мусобақалари ҳам алоҳида ўрин тутади.

Ана шундан келиб чиққан ҳолда Ўзбекистон Республикаси Қуролли кучлари ташкил этилганлигининг 31 йиллиги ва 14 январь – Ватан ҳимоячилари куни муносабати билан Хоразм вилояти ички ишлар органларида хизмат қилаётган хотин-қизлар ўртасида спортнинг “Стол тенниси” бўйича  мусобақа ўтказилди.

Ушбу спорт мусобақасида вилоят ички ишлар органларида хизмат қилаётган барча хотин-қизлар шахсий биринчилик учун ўзаро кураш олиб бордилар.

Қизғин ва муросасиз ўтган мусобақада иштирок этган хотин-қизлар жисмоний тайёргарлик борасида ўзларининг маҳорат ва иродасини намоён этдилар.

Спортда омад кучлиларга кулиб боқади деган олтин қоида мазкур мусобақада ҳам яна бир ўз исботини топди. Мусоқаба якунига кўра Хоразм вилояти ИИБ ЙҲХБ инспектори сафдор Мумтозбегим Артиқова фахрли 3-ўринни эгаллаган бўлса, Хонқа тумани ИИБ Ҳуқуқбузарликлар профилактикаси бўлими инспектори лейтенант Моҳинур Азимова финалда имкониятни бой бериб, шохсупанинг иккинчи поғонасини банд этган бўлса, бир неча йиллардан бери спортнинг ушбу турида ғолибликни қўлдан бермай келаётган Урганч шаҳри бўйича ИИО ФМБ катта инспектори катта лейтенант Насиба Абдуллаева бу гал ҳам ишончли ғалабаси эвазига фахрли 1-ўринни эгаллади.

Ғолиб ва совриндорларни тақдирлаш жараёнида вилоят ИИБ бошлиғининг ўринбосари полковник Абдувохид Имяминов сўзга чиқиб, мусобақада фаол иштирок этган хотин-қизларга ва ташкилотчиларга миннатдорчилик билдириб, келгусида бу каби спорт мусобақалари мунтазам равишда ўтказилишини таъкидлаб ўтди.

Якунда ғолиб ва совриндорлар эсдалик совғалари, диплом ва медаль билан тақдирланди.

Сана муносабати билан ходимлар ўртасида спортнинг бошқа турлари бўйича ҳам мусобақалар ўтказиш кўзда тутилган.

Хоразм вилояти ИИБ Ахборот хизмати