Республика 3-секторларида яшовчи оилалар ўртасида спорт мусобақалари ва китобхонлик беллашувларини ўтказиш мақсадида, Ўзбекистон Республикаси Ички ишлар вазирлиги, Маҳалла ва оилани қўллаб-қувватлаш вазирлиги, Маданият вазирлиги ҳамда Туризм ва спорт вазирликларининг қўшма қарори ижросини таъминлаш мақсадида Хоразм вилоятининг 3-секторларида Ўзбекистон Республикаси Ички ишлар вазири соврини учун “Соғлом ва баркамол оила” шиори остида спорт мусобақалари ва китобхонлик беллашувлари юқори савияда ўтказилмоқда.

Жорий йилнинг 11 декабрь куни Хива ва Гурлан туманларида бўлиб ўтган спорт мусобақалари ва китобхонлик беллашувларида 3-сектор таркибига кирувчи маҳаллаларда истиқомат қилувчи барча оилалар фаол иштирок қилдилар.

Спортсевар оилалар спортнинг  “Стол тенниси”, “Қувноқ стартлар”, “Шашка”, “Шахмат” ва “Бадминтон” турлари бўйича ўзаро куч синашган бўлсалар, китобхон оилалар “Энг яхши маънавий етук оила” номинациясида ғолибликни қўлга киритиш учун беллашдилар.

“Соғлом ва баркамол авлод” шиори остида бўлиб ўтаётган ушбу мусобақаларининг юқорида савияда ташкил этиш масаласига 3-сектор раҳбарлари – ҳудудий ички ишлар бўлими бошлиқлари ва ҳамкор ташкилотлар  томонидан алоҳида эътибор қаратилган.

Хоразм вилоятининг туман (шаҳар)лар 3-секторлари кесимида бўлиб ўтаётган биринчи босқич ғолибларига ташкилотчилар томонидан диплом ва қимматбаҳо совғалар тантанали тарзда топширилди.

Шунингдек, Ўзбекистон Республикаси Ички ишлар вазири соврини учун бўлиб ўтаётган мазкур спорт мусобақалари ва китобхонлик беллашувларининг шаҳар (туман) босқичларида ғолибликни қўлга киритган оилалар вилоят босқичида иштирок этиш учун йўлланмани қўлга киритадилар.

Хоразм вилояти ИИБ Ахборот хизмати